مسمن وملوي مورقين والسر

نقدم لكم  المسمن والملوي قدمتو اخت في احدى المنتديات كيجي مورق ومكرمل والسر فالتوراق ديالو تقول وهاد المسمن ليكلاه عندي كيحماق عليه وكيسول على الطريقة وكيجي ناشف من الزيت وما كيكهمش الطريقة العادية للعجين نفس قياس الفورص ويكون من النوع الممتاز ونفس كمية سبسيال وشوية دالخميرة وضروري من الما البارد ماشي دافي اوا هدا سر من اسرار نجاحو ومزال موصلنا لسر نعجنوه عادي ندلكوه ماتكون لعجينة لاقاسحة ولا جارية ونخليوها ترتاح شوية ومن بعد كنقجو لعجينة ونستفوها فصينية مدهونة وماتخافوش هاد الجريمة مافيهاش اعدام اوا غطيها ببلاستيكة وسيري قضي اشنو عندك وخليها ترتاح  وفهاد الحضة نوجدو السر ديالنا كناخدو زلافة نديرو فيها كمية من الزبدة والزيت والسميدة نكتروها شوية وخمارة ديال الحلة كنخلطة حتى كيتجانس وزلافة اخرى فيها الزيت  اوا الكويرات راه ارتاحو طلقيهم مزيان دهني شوية ديال داك الخليط دالزبدة والسميدة وربعي عادي وكرصي وبداي طيبي فمقلة سخونة مرشوشة بالزيت صافي بلا متبقاي ترشي الزيت غير رميها شوية وقلبيها دغيا وبداي تدوري فيها فالمقلة باش طيب من كل الجناب بلا مضغطي عليها حيت غادي تخصري ليها التوراق  شوفو كيكايتنفخ فحال البطبوط اوا كررو نفس العملية حتى تكملو الكمية لي عندكوم ندوزو للملوي نفس العجينة قسمتها ودرت الكويرات كبار على دياول المسمن اوا طلقيهم بالطول  ودهنيها حتى هي بالخليط وكنكرر ماتكتريش وبداي تلوي على الطول تم على العرض حتى تكملي الكمية لي عندك هاهما حتى هما ارتاحو كرصي وبداي تطيبي ورشي شوية دالزيت صافي وبداي تقلبي حيت ديك الزبدة والزظيت لي لداخل كافيين باش يطيبو  اوا بدا تقلبو وتدوروه غير بالحنان حتى يتحمر اوا هاهما واجدين